राजापुरमा तेस्रो मेयर कप सुरु,१५ समुह सहभागी
जनता समाचार १४,फाल्गुन राजापुर । बर्दियाको राजापुरमा तेस्रो नगर स्तरीय अन्तर विद्यालय मेयर कप तथा १४औं राष्ट्रपति रनिङ शिल्ड खेलाडी छनौट प्रतियोगिता आज देखि सुरु भएको छ। राजापुर नगरपालिका वडा नं ९ स्थित नेपाल राष्ट्रिय माध्यामीक विद्यालय गोडियानामा आयोजना गरिएको प्रतियोगितामा १५ वटा विद्यालय सहभागी रहेका छन् । राजापुर नगरपालिकाका नगर प्रमुख शिवप्रसाद चौधरीको सभापतित्वमा भएको उद्घाटन समारोहमा नेपाल सरकार युवा तथा खेलकुद मन्त्री महेश्वर गहतराज प्रमुख अतिथि, सङ्घीय सांसद सन्त कुमार थारू विशिष्ट अतिथि ,लुम्बिनी प्रदेश सांसद दिपेश थारू लगायतको उपस्थिति रहेको थियो । समारोहमा बोल्दै युवा तथा खेलकुदमन्त्री महेश्वरजङ्ग गहतराजले नेपालका ७ सय ७३ पालिकामै खेलकुदका लागि रंगशाला बनाउने सरकारी नीति रहेको बताउनुभएको छ ।खेल स्वास्थ्यका लागि अपरिहार्य भएको भन्दै मन्त्री गहतराजले खेल क्षेत्रको संरक्षणमा आफूले सकेको सहयोग गर्ने प्रतिबद्धता जनाउनुभयो । बर्दिया थारु संस्कृतिको धनी रहेको भन्दै उहाँले यहाँको पर्यटकीय विकासका लागि तीनै तहको सरकारले सहकार्य गरेर अघि बढ्नुपर्नेमा जोड दिनुभयो ।
